news

సిమ్ కార్డులకు ఆధార్ అవసరం లేదు: కేంద్రం

ఆధార్ లేని కారణంగా సిమ్ కార్డు పొందడంలో ఇబ్బందులు ఎదుర్కొంటున్నవారికి కేంద్రం ఊరటనిచ్చే వార్త అందించింది. అలాంటి వినియోగదారులకు ఆధార్ కార్డు స్థానంలో ఇతర ఐడెంటిటీ కార్డులను పరిగణనలోకి తీసుకోవాల్సిందిగా సూచించింది. ఈ మేరకు టెలికాం కంపెనీలకు ఆదేశాలు జారీచేసింది. ఆధార్‌ కార్డును ప్రతి ఒక్క అవసరానికి తప్పనిసరి చేయడంపై సర్వత్రా ఆందోళనలు వ్యక్తమవుతోన్న నేపథ్యంలో కేంద్ర ప్రభుత్వం ఈ నిర్ణయం తీసుకుంది. డ్రైవింగ్‌ లైసెన్స్‌, పాస్‌పోర్ట్‌, ఓటర్‌ ఐడీ కార్డు లాంటి ప్రత్యామ్నాయ డాక్యుమెంట్లతో సిమ్‌ కార్డును ఇవ్వాలని టెలికాం కంపెనీలను కేంద్రం ఆదేశించింది.

వినియోగదారులకు అసౌకర్యం కలిగించకుండా వెంటనే ఈ ఆదేశాలను అమలు చేయాలని టెలికాం సెక్రటరీ అరుణ్‌ సుందరరాజన్‌ తెలిపారు. ఆధార్‌ కార్డు తప్పనిసరిపై సుప్రీంకోర్టులో వాదనలు జరుగుతున్న విషయం తెలిసిందే. ఈ నేపథ్యంలోనే మొబైల్‌ సిమ్‌ పొందడానికి ఆధార్‌ కార్డు తప్పనిసరికాదని కేంద్రం స్పష్టం చేసింది.

ఇప్పటివరకు ఆధార్ కార్డు పొందనివారు సిమ్ కార్డులు తీసుకోవడంలో ఎలాంటి ఇబ్బందులు ఎదుర్కొంటున్నారో పేర్కొంటూ ‘టైమ్స్ ఆఫ్ ఇండియా’ ఏప్రిల్ 27న ఓ కథనాన్ని ప్రచురించింది. దీంతో ఈ అంశంపై ప్రభుత్వం దృష్టి సారించి వేగంగా నిర్ణయం తీసుకుంది. ‘ఆధార్‌ నెంబర్‌ లేదని వినియోగదారులకు సిమ్‌ కార్డు ఇవ్వడాన్ని నిరాకరించొద్దు. ఇతర కేవైసీ దరఖాస్తులు, డాక్యుమెంట్లను సమర్పించాలని కోరండి. సిమ్‌ కార్డుల జారీని కొనసాగించండి. అన్ని టెలికాం కంపెనీలకు ఈ ఆదేశాలు జారీచేస్తున్నాం’ అని సుందరరాజన్‌ తెలిపారు.

 
గతంలో టెలికాం డిపార్ట్‌మెంట్‌ ఇచ్చిన ఆదేశాలతో మొబైల్‌ కంపెనీలు ఆధార్‌ వెరిఫికేషన్‌ను చేపడుతున్నాయి. ఈ నిర్ణయం నుంచి ఎన్‌ఆర్‌ఐలకు, విదేశీయులకు మినహాయింపు ఇచ్చారు. ఈ ఆదేశాలపై స్పందించడానికి మొబైల్‌ ఆపరేటర్లు నిరాకరించాయి. ప్రభుత్వం ఈ విషయాన్ని తీవ్రంగా పరిగణిస్తున్నట్లు అధికార వర్గాల ద్వారా తెలుస్తోంది..

Comments

comments