news

ఆడపిల్లల జోలికి వస్తే.. ఖబడ్దార్: చంద్రబాబు వార్నింగ్

‘‘రాష్ట్రంలో దాచేపల్లి ఘటనే ఆఖరిది కావాలి. మళ్లీ ఎవరైనా ఆడపిల్లల జోలికి వెళ్తే కఠినంగా శిక్షిస్తాం. అత్యాచారం చేస్తే ఉరికంబం ఎక్కిస్తాం. ఎంత గొప్పవాళ్లయినా ఉపేక్షిచం’’ అని ముఖ్యమంత్రి చంద్రబాబు నాయుడు కామాంధులకు స్ట్రాంగ్ వార్నింగ్ ఇచ్చారు. దాచేపల్లిలో అత్యాచారానికి గురైన బాలికను పరామర్శించిన తర్వాత ఆయన విలేకరులతో మాట్లాడారు.

‘‘ఇలాంటి సంఘటనలు పునరావృతం కాకుండా ప్రజల్లో అవగాహన కల్పించేందుకు, నేరస్తులకు హెచ్చరిక జారీ చేసేందుకు సోమవారం రాష్ట్రవ్యాప్తంగా చైతన్య ర్యాలీలు నిర్వహిస్తాం. ప్రతి మండల, నియోజకవర్గ కేంద్రాల్లో స్థానిక తహసీల్దారు, పోలీసుల ఆధ్వర్యంలో ర్యాలీలు జరుగుతాయి. ఈ ర్యాలీల్లో అందరూ పాల్గొనాలి’’ అని సీఎం పిలుపునిచ్చారు.

నీలి చిత్రాలకు బానిసలవుతున్నారు: ‘‘కొందరు తప్పుడు మార్గంలో వెళ్తున్నారు. నీలి చిత్రాలకు బానిసలవుతున్నారు. సామాజిక మాధ్యమాల్లో ఇలాంటివన్నీ చూసి నేరాలకు పాల్పడుతున్నారు. ఆబోతుల్లా ప్రవరిస్తామంటే ఊరుకోను. ఎవరు ఆడపిల్లల జోలికి వచ్చినా మనుగడ ఉండదు. ఇదే చివరి హెచ్చరిక’’ అని ముఖ్యమంత్రి తెలిపారు. గుంటూరు కొత్తపేట పోలీసులు రమావత్‌ నాయక్‌ అనే వైసీపీకి చెందిన ఓ వ్యక్తిని అత్యాచారయత్నం కేసులో అరెస్టు చేశారని, అతనిపై నిర్భయ చట్టం కింద కేసు పెడుతున్నట్లు సీఎం పేర్కొన్నారు.

వైకాపా.. తప్పుడు రాజకీయాలొద్దు: ‘‘దాచేపల్లి ఘటనలో వైసీపీ తప్పుడు రాజకీయాలు చేస్తోంది. ఖబడ్దార్.. తమాషాలు చేయొద్దు. నోరుందని ఇష్టమొచ్చినట్లు మాట్లాడితే ఊరుకోను. దాచేపల్లి ఘటనలో నేరస్తుడి తమ్ముడి కొడుకు వైకాపా నాయకుడు. గత ఎన్నికల్లో వారి కుటుంబ సభ్యులంతా ఆ పార్టీకే పనిచేశారు. కానీ వైసీపీ ప్రభుత్వంపై బురద చల్లుతోంది. బెట్టింగ్‌లు, ఏటీఎంలలో డబ్బులు కొట్టేయడం, దొంగ నోట్లు మార్చడం వంటి నేరాలు వైసీపీ నాయకులకకే అలవాటు. అత్యాచారం చేసేవాడు.. అధికార పార్టీ అయినా, ప్రతిపక్ష పార్టీ అయినా తప్పు తప్పే. శిక్ష తప్పదు’’ అని హెచ్చరించారు.

అత్యాచారం చేస్తే.. అదే చివరి రోజు: ‘‘రాష్ట్రంలో చిన్నారులపై, మహిళలపై ఎవరైనా అత్యాచారం వంటి నేరాలకు పాల్పడితే వారికదే చివరి రోజవుతుంది. జీవితంపై ఆశ లేకపోతేనే అలాంటి నేరాలు చేయండి. ఇలాంటి నేరాల విచారణకు ప్రత్యేక కోర్టులు పెడతాం. అవసరమైతే చట్టాల్లో మార్పులు తెస్తాం’’ అని అన్నారు.

నేను చండశాసనుడిని: ‘‘నేను సీఎంగా ఉన్ననాళ్ళూ ఇలాంటి ఘటనలు ఎన్నడూ జరగలేదు. భవిష్యత్తులో జరగవు కూడా. నేను ఎప్పుడూ మెతగ్గా ఉండను. కఠినంగా ఉండాలనుకుంటే చండశాసనుడినే. ఒక నేరం చేశాక, మనిషి తప్పించుకోలేని పరిస్థితి సృష్టించాం కాబట్టే… దొరికినా ఉరిశిక్ష తప్పదనే భయంతో దాచేపల్లి నిందితుడు ఆత్మహత్య చేసుకున్నాడు. 48 గంటల్లోగానే కేసు ఛేదించాం’’ అని సీఎం తెలిపారు.

Comments

comments