news

సుప్రీంకోర్టు జడ్జికి రూ. 160 కోట్లు లంచం.. ! గాలి గ్యాంగ్‌పై సంచలన వీడియో..!!

కర్ణాటక ఎన్నికల్లో పోలింగ్ కు రెండు రోజుల ముందు.. కన్నడ న్యూస్ చానల్ “బీ టీవీ” రాజకీయాల్లో సునామీ సృష్టించే వీడియోను బయటపెట్టింది. మైనింగ్ కేసులో సుప్రీంకోర్టులో ఉన్న కేసుకు సంబంధించి పర్మిషన్ ఇచ్చేందుకు రూ. 160 కోట్లు లంచం ఇచ్చేందుకు గాలి జనార్ధన్ రెడ్డి ముఖ్య అనుచరుడు బి.శ్రీరాములు డీల్ కుదుర్చుకుంటూండటమే ఈ వీడియో సారాంశం. వీడియో, మాటలు అన్నీ స్పష్టంగా ఉండటంతో.. పోలింగ్ కు రెండు రోజుల ముందు బీజేపీ పరువు.. ఈవీఎంల ముందు పోగొట్టుకున్నట్లయింది.

ఈ వీడియో 2010లో రికార్డు చేసినట్లుగా భావిస్తున్నారు. వైఎస్ హయాంలో ఆంధ్రప్రదేశ్,కర్ణాటక సరిహద్దుల్ని చెల్లాచెదురు చేసి…ఐరన్ ఓర్‌ను విదేశాలకు తరలించి… వేల కోట్లు వెనకేసుకున్నారు. అప్పట్లో అడ్డుకున్న వారే లేరు. ఆ సొమ్ముతో వ్యవస్థలన్నిటినీ విచ్చలవిడిగా డబ్బుతో కొనేశారు. వైఎస్ మరణం తర్వాత కొంత మంది ధైర్యం చేసి కోర్టుల వరకూ వెళ్లారు. దాంతో 2010లో మైనింగ్ కు బ్రేక్ పడింది.

వ్యవహారం సుప్రీంకోర్టుకు వెళ్లింది. ఆగిపోయిన మైనింగ్ ను మళ్లీ ప్రారంభించుకునేలా సుప్రీంకోర్టు నుంచి నుంచి తీర్పు తెచ్చుకునేందుకు గాలి జనార్ధన్ రెడ్డి పరివారం చేసిన ఖర్చు రూ. 160 కోట్లు. సుప్రీంకోర్టు జస్టిస్ అల్లుడితో ఈ డీల్ కుదుర్చుకున్నారు. ఆ తర్వాత మైనింగ్ చేసుకోవడానికి సుప్రీంకోర్టు అనుమతి ఇచ్చింది. అప్పట్లో.. ఈ తీర్పుపై అనేక అనుమానాలు వ్యక్తమైనా…న్యాయవ్యవస్థపై గౌరవంతో ఎరూ నోరు మెదపలేకపోయారు.

కన్నడ టీవీ చానల్.. శ్రీరాములు నిర్వాకాన్ని నిర్విరామంగా ప్రసారం చేస్తోంది. రాష్ట్రాల సరిహద్దులను చెరిపి వేసి.. రూ. 50 వేల కోట్ల విలువైన ఖనిజ సంపదను విదేశాలకు తరలించినట్లు గాలి జనార్దన్ రెడ్డిపై కేసులు ఉన్నాయి. ఈ పరివారంలో.. బి.శ్రీరాములు నెంబర్ టూ. గతంలో… గాలి జనార్దన్ రెడ్డికి బెయిల కోసం.. హైదరాబాద్ లోని సీబీఐ న్యాయమూర్తికి కూడా లంచం ఇవ్వజూపిన కేసులో… శ్రీరాములు పేరు ఉంది. గాలి సోదరుడు సోమశేఖర్ రెడ్డి… ఈ కేసులో బెయిల్ పై బయట ఉన్నారు.

ఈయన కూడా ఇప్పుడు బళ్లారి నుంచి అభ్యర్థిగా పోటీ చేస్తున్నారు. గాలి జనార్దన్ రెడ్డికి సీబీఐతో క్లీన్ చిట్ ఇప్పించేందుకు బీజేపీ సిద్ధమయిందని ప్రచారం జరుగుతోంది. ఇప్పటికే.. కర్ణాటక, తమిళనాడు, గోవా రాష్ట్రాల సీబీఐ అధికారులు ఆధారాలు లేవని కేసు క్లోజ్ చేశారు. హైదరాబాద్ సీబీఐ అధికారులు దాఖలు చేసిన కేసుపైనే విచారణ జరుగుతోంది.

Comments

comments