news

‘మెట్రో’కు ముహూర్తం రెడీ !

తెలంగాణ రాష్ట్ర ప్రభుత్వం ఎంతో ప్రతిష్ఠాత్మకంగా తీసుకున్న హైదరాబాద్ మెట్రో తొలిదశ ప్రారంభానికి ప్రధాని నరేంద్ర మోదీకి ఆహ్వానించారు. కానీ ఈ ప్రారంభానికి మోదీ వస్తారా? లేదా? అన్న సందేహంలో రాష్ట్ర ప్రభుత్వం ఉంది. అయితే ఈ సందిగ్ధ‌త‌కు తెరదించుతూ ఈ నెల 28 న హైద‌రాబాద్‌లో ప్ర‌ధాని మోదీ ప‌ర్య‌ట‌న షెడ్యూల్ ఖ‌రారైంది.
నవంబరు 28న మ‌ధ్యాహ్నం 2.30కు ప్రధాని ప్రత్యేక విమానంలో బేగంపేట విమానాశ్ర‌యం చేరుకోనున్నారు. బేగంట‌పేట నుంచి మియాపూర్‌కు హెలికాప్ట‌ర్‌లో వెళతారు. మియాపూర్‌లో మెట్రోరైల్ పైలాన్‌ను ప్రారంభించి, అనంత‌రం మియాపూర్ నుంచి కూక‌ట్‌ప‌ల్లి వ‌ర‌కు మెట్రలో ప్ర‌యాణిస్తారు.

తిరిగి అదే రైలులో కూక‌ట్‌ప‌ల్లి నుంచి మియాపూర్ చేరుకుంటారు. ఆ తర్వాత హెచ్ఐసీసీలో జ‌ర‌గ‌నున్న‌ ప్ర‌పంచ వ్యాపార‌వేత్త‌ల స‌ద‌స్సులో ఇవాంకా ట్రంప్‌, తెలంగాణ‌ సీఎం కేసీఆర్‌తో క‌లిసి పాల్గొంటారు. ప్రధాని పర్యటనకు సంబంధించి అధికారిక ప్ర‌క‌ట‌న కూడా విడుదలైంది.

ఈ సందర్భంగా సచివాలయంలో ప్రభుత్వ ప్రధాన కార్యదర్శి ఎస్పీ సింగ్‌ నేతృత్వంలో సమన్వయ కమిటీ భేటీ అయ్యింది. డీజీపీ మహేందర్‌రెడ్డి, పోలీసు ఉన్నతాధికారులు, మెట్రోరైల్‌ ఎండీ ఎన్‌వీఎస్‌రెడ్డి, హైదరాబాద్‌, రంగారెడ్డి జిల్లాల కలెక్టర్లు ఇందులో పాల్గొన్నారు. ఈ భేటీలో ప్రధాని మోదీ, వైట్‌హౌస్‌ సలహాదారు ఇవాంకా ట్రంప్‌ పర్యటన ఏర్పాట్లపై సమీక్షించారు.

ఈ సందర్భంగా మెట్రోరైల్‌ ఎండీ ఎన్‌వీఎస్‌ రెడ్డి మాట్లాడుతూ.. ‘‘మెట్రో రైలుకు అన్ని అనుమతులు వచ్చాయి. ప్రారంభానికి సిద్ధంగా ఉన్నాం. ఈనెల 28న మెట్రో రైలు ప్రారంభం ఉంటుంది. ప్రధాని మోదీ మెట్రో రైలులో పర్యటిస్తారు. మరుసటి రోజు నుంచి మెట్రో కార్యకలాపాలు మొదలవుతాయి. మొదటి ఆరు నెలలు తక్కువ సంఖ్యలో రైళ్లు నడుస్తాయని వివరించారు.

 

Comments

comments