Business news

విమాన ప్రయాణికులకు గుడ్ న్యూస్..!

అన్ని అనుకున్నట్లు జరిగితే మరో మూడు లేదా నాలుగు నెలల్లో విమాన ప్రయాణికులు ఫోన్‌లో మాట్లాడుకునే అవకాశం రాబోతుంది. సెల్‌ఫోన్‌లో మాట్లాడుకోవడంతోపాటు ఇంటర్నెట్ కూడా ఉపయోగించుకునే వెసులుబాటు సాధ్యం కానుంది. ఈ మేరకు టెలికాం కమిషన్‌ ఆమోదం తెలిపింది. టెలికాం కార్యదర్శి అరుణా సుందరరాజన్‌ అధ్యక్షతన జరిగిన సమావేశంలో ఈ నిర్ణయం తీసుకున్నారు.

 

డొమెస్టిక్ విమానాలతోపాటు, ఇంటర్నేషనల్ విమానాల్లోనూ ఈ సేవలు అందుబాటులోకి రానున్నాయి. ఇప్పటికే కొన్ని అంతర్జాతీయ విమానాలు ప్రయాణికులకు వైఫై సేవలను అందిస్తున్న సంగతి తెలిసిందే. అవి భారత్‌లోకి ప్రవేశించగానే సేవలు నిలిచిపోతున్నాయి. అయితే తాజా నిర్ణయం అమల్లోకి వస్తే.. ఇలాంటి సమస్యలు దూరం కానున్నాయి.

 విమానం కనీసం 3,000 మీటర్ల ఎత్తుకు చేరాక, ఈ సేవలను అనుమతిస్తారు. ప్రస్తుతం దేశీయ గగనతలంలోకి వచ్చాక, విమానాల్లో మొబైల్‌ సేవలకు అనుమతించడం లేదు. విమానయానంతోపాటు..నౌకాయానంలోనూ మొబైల్ ఫోన్ వినియోగానికి టెలికాం కమిషన్‌ ఆమోదం తెలపడం విశేషం. దేశీయ పరిధిలోని జలాల్లోకి ప్రవేశించాక, ఈ సేవలు ప్రయాణికులకు అందుతాయి.

Comments

comments